काठमाडौं। चलचित्र 'सारथी'को प्रोमो सार्वजनिक भएसँगै नेपाली सिनेमा क्षेत्रमा निकै चर्चा भइरहेको छ। यही खुशीको घडीमा 'अहुरी'को निर्देशकका रूपमा म, विशाल लोहनी, 'सारथी'का निर्देशक कुमार गजुरेललाई हृदयदेखि बधाई दिन चाहन्छु।
एउटा निर्देशकका रूपमा गर्वको क्षण
निरुता सिंह जी लाई गम्भीर र भावुक रूपमा प्रस्तुत गरेको प्रोमो हेर्दा मलाई एउटा निर्देशकको मेहनत प्रस्ट देखियो। बच्चाको रुवाइबाट सुरु भएको दृश्य, काखमा शिशु बोकेकी पात्रको मौन मुद्रा र पैतालाबाट बगेको रगतले धेरै संवाद नभएरै कथा भन्न सकिन्छ भन्ने देखाएको छ। यस्तो प्रस्तुति गर्न निर्देशकमा कथाप्रति गहिरो विश्वास र दृश्यप्रति स्पष्ट दृष्टि चाहिन्छ। कुमार गजुरेलले त्यो गरेर देखाएका छन्।
सिनेमाको भव्यता र टोलीको मेहनत
म्याग्दीको गुर्जाजस्तो कठिन र सुन्दर पहाडी क्षेत्रमा चलचित्र खिच्नु सजिलो काम होइन। छायाकार संकल्प भुजेलदेखि कलाकार, प्राविधिक र निर्माण टोलीसम्म सबैको मेहनत यो चलचित्रमा देखिनेछ भन्ने मलाई विश्वास छ। निरुता सिंह, उत्तम प्रधान, मुकुन्द श्रेष्ठ, राजेन्द्र केसी, सम्रान्त थापा, गिरी विश्वकर्मा लगायतका कलाकारको सहभागिताले यसलाई अझ बलियो बनाएको छ। किम्भे प्रोडक्सन र धिरज फिल्म इन्फिनिटीको टोलीलाई पनि मेरो शुभकामना।
निर्देशकबाट कलाकारसम्म
कुमार गजुरेल केवल निर्देशक मात्र होइनन्, हाम्रो चलचित्र 'अहुरी'मा मुख्य पात्र 'कृष्ण'को भूमिका निभाइरहेका कलाकार पनि हुन्। अहुरी इन्टरटेनमेन्ट प्रा.लि.को प्रस्तुति र प्रतिफल फिल्म्स प्रोडक्सनअन्तर्गत बनिसकेको र पुन संसोधन गरेको यो चलचित्र सन् २०२७ मा देश ब्यापी रुपमा प्रदर्शनमा आउने योजना छ। 'अहुरी'को निर्देशकका रूपमा मैले उनलाई क्यामेराअगाडि 'कृष्ण'को पात्रमा ढल्दै गरेको नजिकबाट देखेको छु। एकै व्यक्तिले पर्दापछाडि बसेर 'सारथी'को कथा निर्देशन गर्ने र पर्दाअगाडि उभिएर 'अहुरी'मा कृष्णको पात्र जीवन्त बनाउने क्षमता राख्नु निकै ठूलो कुरा हो।
'सारथी'का लागि शुभकामना
मंसिर ११ गतेदेखि सिनेमा हलमा प्रदर्शन हुने 'सारथी'ले दर्शकको मन छुनेछ र राम्रो सफलता पाउनेछ भन्ने मेरो विश्वास छ। चलचित्र भव्य होस्, दर्शकको माया पाओस् र नेपाली सिनेमाको इतिहासमा आफ्नो छुट्टै ठाउँ बनाओस्, यही मेरो हार्दिक शुभकामना छ।
कुमार भाई, तपाईंलाई निर्देशकका रूपमा यो उपलब्धिको लागि फेरि एकपटक बधाई। 'सारथी' र 'अहुरी' दुवैको यात्रा सफल रहोस्।
— विशाल लोहनी
निर्देशक, 'अहुरी'
